Śląska Karta Usług Publicznych dali niý przijyna sie na dobre u pasażyrůw. Co roz słychać jak godo sie ô plusach a minusach takij karty. Teroski ŚKUP bydům musieli mieć Ci, co chcům mieć bilet ôkrysowy.

Niýwtorzi Śląską Kartę Usług Publicznych juże majům. Inksi zaś dali wolům papiůrzane bilety. Jednako juże ôd 1 maja niý sům sprzedowane papiůrzane bilety: 4-godzinne, 48- godzinne, 5-, 7- a 14-dniowe, kwartalne, szkolorske, wakacyjne ai miesiynczne na ôkaziciela. Te bilety sům teroski dostympne ýnoś elektrůnicznie bez Karta ŚKUP. A jako padali Komunikacyjny Związek Komunalny Górnośląskiego Okręgu Przemysłowego je to pozitiwno pomiana dlo samych pasażyrůw.

 

Jednako juże same pasażery roztomajcie sie ô takij idyji myślům. Łoskargowuje sie tyż przi tymu KZK GOP, iże przimuszo pasażyrůw do kupowanio biletůw elektrůnicznych a niý papiůrzanych, coby piniůndze ze Unie na tyn projekt niý bůły wziynte nazod. A to na zicher by sie ôdczůło, bo ze unijnyj kasy ŚKUP dofinansowany uostoł na 78,4 mln zł. Jednako ôd razu we KZK GOP ôdpedzieli, co to blank niý ma prowda. Tym barzi, iże coby te dofinansowaniý uostało cofniynte, to musi być ô co wiyncy roztolicznych prziczyn.

 

Beztuż wycofane papiůrzane bilety ôkresowe bydům teroski we wersjach elektrůnicznych i to we dwůch zortach: ze limitym przejozdůw abo li bez. Jako sie to przełoży na pasażyra? Dejmy na to kej wtoś mioł bilet papiůrzany 30-dniowy na autobusy a banki bez limitůw na terynie wiyncy niźli 2 gminůw, to musioł za niego zabulić 150 zł. Za taki sům bilet ýno że ŚKUP, to trza zabulić 144 zł. Kej zaś wtoś jeszcze sie uobsztaluje bilet we karcie ŚKUP ze limitym przejozdůw do 80, to za 30 dni bydzie musioł zabulić ýno 132 zł.

KOMENTARZE