Szkolorze ze Zespołu Szkołůw nr 5 na Wiyrku we Rudzie Ślůnski mieli sposobnoś pojechać ze szule na praktyki do Niýmiec. 19 januara cołki program uostoł juże podsumowany.
A chocioż 14 szkolorzy ze Zespołu Szkołůw nr 5 we Rudzie Ślůnski bůło bez miesiůnc poza haupům, to chyba żodyn s nich niý żałuje. Bez tyn czos byli we Niýmcach na praktykach. Dziynka tymu můgli sie szkolić we swoim fachu a uoboczyć jako to we praktyce wyglůndo. Techniki elekryki a spedytory umieli pojechać na tako ekstra rajza skiż tego, co szula wziyna udzioł we europyjskim programie Erasmus Plus.
Tako rajza, to niý ýno fach praktyki. Je tyż to ôkazjo, coby uoboczyć inkszy kůnsek świota a przi tymu podszlifować godka. Toć kaj jak kaj, nale nojlepi to godki uczyć tam, kaj je łůna normalnie używano. Tym barzi, iże czynsto we ksiůnżkach je szkryfniynte na jedne, a ludzie na druge godajům.
Jednako jako bezmaś kożdy moge pedzieć, werciło sie pojechać, bo take doświadczyniý moge we prziszłości prziniyś dobry skutek. A chocioż czosym buło trocha ciynży, to jako we podsumowaniu widać, kůniec kůńcůw wyszło na plus.