Kożdy, wto interesanci sie we strzydniowiyczu, zůmkach a riterach moge tera prziś do bytůńskich riterůw. Na ekstra trefach trynujům łůni fechtůnek ze mieczami a niý ýno. Coby uoboczyć wiyncy Bytomskie Stowarzyszenie Rekonstrukcji Historycznej „Leo Corde” zaproszo na zůmek.
We Bytůnio je juże strzydniowiyczny zůmek. Kaj? Ano we niýużywany hali Szkoły Podstawowy nr 45 we Szůmbiyrkach. Na zůmek we wolnym czosie prziłażům nojprowdziwsze Ritery. No praje, bo tak po prowdzie to ferajnioki Bytomskigo Stowarzyszenio Rekonstrukcji Historycznej "Leo Corde". A chocioż zůmka dorobiyli sie niýdowno, to sům juże widziani kaj niýkaj. Toć bajslowali łůni roztomajte riterske turniyje.
Dlo dobrego rychtůngu zaś na taki turniyj, to trza trynować. Niýkerym sie moge zdać, iże to je take machaniý patykiym ýno, jednako coby wszysko bůło efektowne a zicherne, trza mocka tryningůw. Kej jednako kogoś niý interesanci take tryniowaniý, to i tak zaproszůmy, bo je we zůmku tyż pora inkszych zekcyj.
Beztůż we czosie cofnyć sie moge bezmaś kożdy, a coby sprůbować, to ritery zaproszajům we kożdy wtorek ô 6 we wieczůr a szwortek ô 5:30 po połedniu. Norychta ze instruktorami sům za fatki, bezto werci sie iś uoboczyć.