Szofer autobusa, kery je tak fajnie uobleczůny, niý zowdy musi tak fajnie tyż sie zachowywać. Dostalimy niýdowno maila, we kerym wtoś pedzioł, jako we autobusie 155 nojprzůd niý poradziům sie doprosić o uodewrzicie przednich dźwiyrzy a nostympnie mioł skokać bez uokno autobusa, coby wylyź.

Dlo KZK GOP take zachowaniý szofera je ôkropiczne, jako pedzieli nům Emil Markowiak. Jednak nojprzůd wszysko trza bůło wyeklerować. Tym barzi, iże trza wejrzeć jeszcze na to, co kożdy mo inkszy tympyramynt a bezto inakszy sie zachowuje. Niý kożdy poradzi sie fajnie, kultůralnie zachowywać. Jednako szofery powinny być na zicher asertiwne.

Tuż jako to je ze tům kultůrům szoferów we busach u nos? Pedzieliście nům sami. Jedni godali, iże sům łůni půmocni, kultůralni a uczynliwi, bezto niý idzie ô nich pedzieć złego słowa. Inksi padali jednako, iże trefi sie taki niýprzijymny, kery nawet niý myśli ô pasażerach, ale ýno ô swoim busie.

Jednako trza sam tyż wejrzeć sie na to ze drugi zorty. Szofery tyż niý majům leko. Robota niý roz je ciynżko, a jeszcze wiela je takich istnych, co myślům, iże jak wlezům do busa, to łůni sům wielge Pany. Pasażery tyż poradzům dopiyc inkszym we busie ai szoferům. Jako padali nům jedyn szofer ze 130, czosym niý poradzům nawet doczkać ta chwila, aże szofer zatrzimie sie na nostympnym przistanku, coby sprzedać im bilet. A przi tymu pedzům, co myślům ô takim szoferze, kery niý chce im tera i to już sprzedać tego bileta.

Prziłazi mi sam do gowy tako kůnkluzjo. Bezmaś kożdy by chcioł być kultůralnie traktowany, bezto niych taki sům bydzie tyż do inkszych. I pamiyntejcie: kożdy uśmiych, moge sprowić nostympne.